خلفية :في العاشرة من صباح يوم الثلاثاء الموافق 3 يونيو 2008 شنت قوات أمن البحيرة تجريدة وحشية على فلاحي وفلاحات عزبة البارودي – مركز الرحمانية لتنفيذ حكم قضائي ضد 17 أسرة تزرع 13.5 فدان من أراضي الإصلاح الزراعي منذ أكثر من 50 عاما.. ارتكبت قوات الأمن كل ألوان التنكيل والإرهاب ضد الفقراء العزل   

دخلوا البيت الساعة 11:30 الظهر.. كسروا الباب.. ضربوني أنا و بنت عمي.. أختي الحامل سابوها لكن بنت عمي عايده [أحمد خنيزي] عندها كدمات كبيرة، ضربوني بالخرزانه في كل جسمي، جرجروني من شعري نزلوني للبوكس، رحنا المركز وسابونا هناك، من الساعة 12 الظهر للساعة 2 كنا تسعه في أوضة واحده بدون أكل أو شرب.. دخلوا على بيتنا هجم لأن الناس كانت بتتحامى فينا. ضربوني و ضربوا بنت عمي، صحوها من النوم، حتى أمي كانت قاعده و شايلة عيل، ضربوها بالعصاية في وشها. كانوا عايزين يقلعوها النقاب. الضابط محمد عمار مسكها من شعرها و بقى يخبط رأسها في الحيط و شد النقاب قطعوه و دخل علينا بالفاظ فظيعة.. رديت عليه، أنا مش بت و مش بشتغل عند حضرتك، ضربني و جرني من شعري جر على البوكس مسافة كبيرة.

في القسم قلت له: حضرتك متعلم أزاي تقول ألفاظ زي دي؟.. رد و قال: أحنا بندرسها في الكتب.. وبعدين قاللي "أنت لسانك طويل و مستقبلك كويس" قلت له "مستقبل في إيه بقى، السرقة ولا الشحاتة بعد ما أخذتم أرضنا"

الاصابات: كدمات متعددة في الأطراف السفلي