شهادات نساء سراندومع اقتراب حلول 2007 "عام حق الفتاة المصرية" يجدربنا تصفح أوراق الماضى القريب، لنقف على ما اصاب "الفتاة المصرية" من انتهاكات ،فربما استطعنا  تفاديها. ومن النظرة الاولى نجد فى  الماضى سجلا غير مشرف لحقوق الانسان عامة وللفتيات بوجه خاص، فالى جانب ما ورد من شهادات فى تقرير"خبرات نساء فى أقسام الشرطة" نقرا هذه الشهادات لنساء قرية سراندو قرية البرنوجى مركز دمنهور بمحافظة البحيرة، يروين ما تعرضن اليه على ايدى قوات الشرطة بعد اقتحامها القرية فى مارس 2005 .

(عن مجلة "أوراق اشتراكية" سبتمبر/أكتوبر 2005 احمد عبد الرؤوف)

"حاسة ان فيه حد بيتصنت عليا عشان ياخدنى"
شهادة:صفاء

"يوم الجمعة كنت عاوزة أكشف على أخويا الصغير، ومع الشرطة والعربيات الزرقا الكبيرة ، بقيت مش عارفة أروح بأخويا فين.اخويا تعبان جامد على أيدى..قلت أروح للبروتوجى علشان فيه وحدة صحية هناك. لما شفت العسكر ف كل مكان نزلت فى الزراعة . اخويا سخن بعد شوية وأنا مستخبية، شافنى بعض ولاد الحلال فى العزبة المجاورة فخدونى وكشفوا على اخويا .أخواتى هربوا 15 يوم من سراندو والخباصين ف العزبة-بتوع نوار- عرفوا الشرطة المكان اللى أخويا شغال فيه .

هو ساكن فى الدور الرابع، ولما شاف القوة جاية تقبض عليه حاول ينط م الدور الرابع! مسكوه وهو حيرمى نفسه وحبسوه فى مكان حر، وداسوا عليه بالجزم، غير الشتيمة .أبويا عمره فوق الستين وشغال ف الصحرا، الخباصين بلغوا عنه،راحوا قبضوا عليه وبهدلوه وحبسوة سبع أيام عشان قال كلام ما عجبش الظابط .

أنا من كتر خوفى بنام من يومها على السرير مبتحركش،حاسة ان فيه حد بيتصنت عليا عشان ياخدنى!".

===============

"احنا شفنا الموت"
شهادة:سهام
"احنا فوجئنا باللى بيكسروا الباب علينا ، ووقعونى فى دخلتهم وقعوا خزين البيت وفجعونى أنا والبنات واحنا نايمين بهدوم حفيفة. احنا شفنا الموت وخدوا ابنى اللى غاب 35 يوم من المعهد الازهرى.صلاح نوار ده معاه فلوس كتير بيشترى بيها الناس اللى بتقلع الزراعة عشان يتهم الفلاحين.

هو شايف شغله مع الشرطة ،فلوس وعزايم، اللى بيقول كلمة حق منا ياخدوه ع المركز يعذبوه، محمد عمار عذب ستات وطلبة كتير ، حتى الاطفال حبسهم علشان يغيروا أقوالهم اللى ضده .حتى الست رشيدة-دى عندها 60 سنة- اخدوها وحبسوها عندهم وشتموها بحاجات وحشة.

أنا حسيت أن الحكومة مش بتقف مع الغلبان، بتقف مع الغنى المقتدر بس".
=============================================================
"ضربوا ابنى الصغير وانا نزفت"
شهادة: سلمى
"دخلوا علينا البيت عشان ياخدو جوزى ، كنت أنا والعيال نايمة ، كسروا الباب وشتمونا بكلام قبيح قمت مفجوعة ، جوزك فين؟ معرفش ، ضربونى ف الحيط، بعدين ما عرفتش انا مين،أغمى عليا .ضربوا ابنى الصغير وأنا نزفت ، الولد قعد يعيط لحد ما خدوا جوزى بهدومه الداخلية,

بعد الليلة دى أنا فضلتت نايمة م التعب والوجع بتاع الضرب لحد تانى يوم لضهر، وابنى بيعيط ريحى .بعد الهوجة بتاعة الحرق وضرب النار من الصعايدة اللى اشتراهم صلاح نوار ، علشان يستولى على الارض ، بعد حبس الرجالة فى الفجر، وهروب باقى الرجالة فى الضحى ماكنش فى حد يحمى الستات فى العزبة.جت الشرطة تلم الستات وتضرب وتكسر فى الابواب ، حتى العيال اتضربت، وأنا لسه كنت واخدة علقة .

فى الفجر خدونى تانى بالضرب والاهانة ومعايا ابنى، كان مكتوب علينا الاهانة، من الكبير للصغير فى العزبة،علشان نوار.

أنا لما رجعت من الحبس، بعد المظاهرات اللى ف مصر، لقيت الشرطة محتلة البيت واوضة النوم كمان، كل عزبتنا اتظلمت بالذات احنا الستات ، عشان احنا اللى ف وش المدفع ، والطلبة معظمهم جابوا ملاحق بسبب احتلال الشرطة للعزبة" .

============================================================

"منها لله الشرطة"

شهادة:خديجة
كسروا الباب علشان يدوروا على جوزى ، جوزى كان فى الشغل .ضربونى وفضلوا يفتشوا ، وكسروا حاجات كتيرة ، حتى خزين البيت قلبوه ع الارض وبهدلوا حماتى، العيال كانوا نايمين ، وسرقوا حاجات م البيت ودبحوا الطيور.

سبت البيت وهربت، منها لله الشرطة ، دول اتهموا جوزى اتهامات باطلة ،وكانوا بيناموا فى بيتى، واحنا هربانين أخدوا اختى-بنت بنوت- بدل منى زيادة عن أسبوع عشان تقول فين جوزى ، وهى ما تعرفش حاجة. ده من الخوف ابنى ما بينامش ف البيت لحد النهاردة.

أنا كرهت الشرطة من يوم الهرجة وبقيت أخاف منها ،أنا كنت فاكراها بتقف مع الحق ، لكن عرفت انها بتقف مع اللى بيدفع لها ، الحكومة بتاعتنا كمان بتقف مع اللى معاه فلوس ، مش مع اللى غلبان زينا .

أنا بادعى لكل الناس الغريبة اللى جت ووقفت معانا وطلعتنا والرجالة م السجن، ربنا ينصرهم، الربطة دى هى اللى هتنفعنا.

===================================

"الظابط داس على رقبتها بالجزمة وهى بتصوت"
شهادة:عطيات
لما الشرطة وصلت انا كنت محبوسة فى البيت ، ماكنتش عارفة أطلع وهددونى علشان اطلع انهم هيكسروا البيت علينا . بعد كده طلعت أختى تملى مية ، مسكوها وضربها الظابط ، داس على رقبتها بالجزمة وهى بتصوت ، ورفصها ف  بطنها وضرب أمى وهى ست كبيرة بسبب اننا عاندناه ومطلعناش م البيت.

هربنا بعد الليلة دى اللى اتضربنا فيها وقعدنا شهر عند قرايبنا فى  الصحرا ، رجعنا بعد كده لقينا كل حاجة مسروقة، الشرطة ما سابتناش برضه ،كانوابيتهجموا علينا ف نص الليل عاوزين ياكلوا، ولما كنا نقولهم مافيش اكل كانوا بيشتمونا كلام قبيح.خالى كان مسافر اسكندرية ، مسكوا أمه اللى هى ستى ،عندها 56 سنة،ضربوها عشان يلبسوه تهمة، مع انه عايش فى اسكندرية من اربع سنين ومالوش دعوة باللى حصل.
=============================================================
"ااحنا اتظلمنا أوى"

شهادة:داليا
احنا اتظلمنا اوى!بالذات العيال والستات، عندك احمد، عنده 3 سنين ،ضربوه عشان ياخدوا ابوه .جه صلاح نوار وبلطجيته الصعايدة وضربوا علينا نار، بعد كده جت الشرطة والعساكر ومحمد عمار ، ده ضغط على الستات بعد كده عشان يشهدوا معاه ف النيابة ، ده عدل؟

من يوم اللى حصل واحنا مش عارفين ننام زى الناس ، العساكر كانت بتشتمنا واحنا رايحين المدارس ، حتى سعيد الخفير كان بيشتمنا عشان صلاح نوار ، اصحابنا عرضوا علينا اننا نكون ضيوفهم فى العزب اللى جارينا ، لكن انا رفضت.

كنا بنحسب ان الشرطة بتحمى المظلوم، اتضح انها بتحمى اللى معاه فلوس ، والست كريمة ام ابراهيم طلعت عشان تتحايل على الشرطة تسيب ابنها عشان عنده امتحان ،ضربوها.حتى الست خيرية تعرضت للضرب لحد ما جالها نزيف وهى حامل علشان ياخدوا جوزها.كمان الست سنية ،جزها ميت وعندها بنتين ،ضربوها وخدوا ابنها محمد.وعندك رحاب ، اخدوها بعد ولادتها بخمستاشر يوم وحبسوها،وفضل الواد من غير رضاعة ، ورفض محمد عمار يجيبولها الواد ترضعه .اهم حاجة الست نفيسة، بسبب الضغوط عليها والتعذيب ماتت!.
=============================================================

"لو مامشيتش حاخدك معايا زى الكلب"
شهادة:كاميليا
انا حسيت بالظلم،وأنه مافيش عدل، لانه لو فيه عدل ماكنش حاجة من دى حصلت، وماكانوش اخدوا العيال وحرموا الطلبة م الامتحانات بسبب احتلال الشرطة للعزبة.

انا اخويا أخدوه وضربوه ،وقالوا لامى ده رهينة لحد ما ابوه يسلم نفسه، أمى عرفتهم انه عنده امتحان ، لكن لا حياة لمن تنادى ، الظابط عمر اخده من ايديها، واحد من الجيران اتدخل عشان يفهمه انه عنده امتحان،قاله لو ما بعدتش حاخدك معاه انت كمان ، ولما سأله جارنا انت معاك اذن نيابة،قاله والله لو مامشيتمش حاخدك معايا زى الكلب!.

رمينا لاخويا هدوم ف العربية ،رموها العساكر تانى ع الارض ،وراح على اخويا مادتين من الدور الاول وكمان سقط فى الدور النهائى .