تراه كثيرا فى وسط البلد، وتسمع عنه فى شهادات ضحايا التعذيب، وتراه يحاول تغطية وجهه اذا حاولت تصويره، انه:"سموأل ابو سلحة" الضابط بقسم شرطة قصر النيل.

وبقدر ما تستغرب الاسم، لا تستغرب "القسم"!، فمن زمن كان قسم قصر النيل مكانا جيدا لاحتجاز وتعذيب المواطنين، يكفى ان تمر من امام الشارع الموجود به الساعة 7 مساء، واتحدى ان تجد مصدر اضاءة واحد، لتدرك بسهولة انك اما طريق "تروح منه وماترجعش".

وقبل واقعة تعذيب الناشط محمد الشرقاوى، كان للقسم القصر سجلا حافلا، رغم انه لم ينكشف منه الكثير، ففى قسم قصر النيل تم تعذيب المواطن "محمد شحته"حتى الموت، باوامر واشراف الباشا طارق حسن، وهو ما تحققت من المحكمة، لكن حسن لم يعاقب بأكثر من الحبس سنة مع ايقاف التنفيذ.

وفى قسم قصر النيل تم تعذيب المواطن " باسل عبد المحسن حمودة" فى اكتوبر1998، ويذكر الدور الاول للقسم وقائع تعذيبه الوحشى، للدرجة التى جعلت مباحث أمن الدولة بنقله إلى مستشفى مصر المعادى للعلاج على نفقتها سراً!، وفى مستشفى المعادى لفظ باسل انفاسه.

وفى قسم قصر النيل، تعرض اثنان من شباب المدونين الى سوء المعاملة والاحتجاز فى نوفمبر الماضى، ليس لسبب سوى انهم "كانوا بيتمشوا"

والى قسم قصر النيل اقتيد الكثير من النشطاء، منهم –فقط على سبيل المثال- أحمد صلاح الدين علي (39 سنة) الذى اعتقل من امام نادى القضاة فى يونيو 2006 الساعة الثانية والنصف فجرا، واقتيد الى قسم قصر النيل، ويروى:" العربية تحركت.. وصلت مكان مش بعيد أوي لاننا ما مشيناش كتير.. قعدنا حوالي من نصف ساعة لساعة وأخيرا استجابوا ونزلوني أنا والتلاتة التانيين.. قلبوا الفانلة على وشي لغاية العربية التانية وطلعوني في عربية الترحيلات التانية كان فيها حوالي 5 أو 6 أنفار تانيين وجابوا حتة قماش قذرة وغموني بيها بشدة خانقة.. ما كناش قادرين نشوف حد.

السيارة تحركت وقعدت تلف وتقف.. وكل شويه ييجوا ناس يحققوا معنا في العربية.. انت مين وتليفونك كام وشغلتك ايه والأهل وتفاصيل شخصية تانية مع كمية تريقة طول الوقت من بعضهم.. كانوا بيقولوا لنا انتم مش هتشوفوا النور.. انتم هتروحوا المعتقل.. الكلام ده حصل بتاع خمس مرات.. الوضع ده استمر لحد تاني يوم..

بعدها نزلونا ودخلونا في مكان.. طلعنا سلالم ونزلنا سلالم وهم شايلينا بالطريقة اياها.. من دراعاتي وراسي ووسطي.. وقفونا طابور ودخلونا في مكان وقفلوه علينا.. واحنا جوه بدأ البعض يفكوا نفسهم.. حالتي كانت سيئة جدا.. كنا 12 واحد.. قعدنا جوه حوالي ساعتين.. مصطبة حرف U في زنزانة حوالي 3 في 3 أو أصغر شويه وكان فيها حمام.. بعدها بفترة فتحوا الباب وعرفنا واحنا خارجين ان احنا في قسم قصر النيل".

فى قسم قصر النيل تم احتجاز المواطنة نادية مبروك ووليد صلاح لمجرد مشاركتهما فى احتجاج سلمى ضد التحرشات الجنسية بالفتيات!، وقضت نادية 6 ساعات متواصلة فى التحقيقات.

ولان الاقسام على مواقعها تعمل ، كان لقسم قصر النيل النصيب الاكبر من بلاغات رواد نادى الجزيرة الواقع فى دائرة القسم، وبلاغات الفنانين ولاعبى الكرة الذى يسكن عدد منهم فى دائرة القسم، والمشاركة فى "السيطرة الامنية" على الاحتجاجات التى يتم تنظيمها فى وسط البلد، التى تقع فى دائرة القسم.

ولانه ربما تقع ارادة القدر، وتقضى ليلتك فى قسم قصر النيل، اقرأ بقانون التخشيبة هناك:
- دقيقة فى المحمول 20 جنية
- فرشة للنوم 10 جنية
- غطاء للنوم 10 جنية
- الأكل والسجايرمن خارج الحبس يمران على امين الشرطة اولا
- اللى ممعوش مايلزموش
- اللى مش عاجبه ينام فى الحمام